काठमाडौं । विश्व स्वास्थ्य संगठन (डब्ल्युएचओ) का नेपाल प्रतिनिधि जोस भ्यान्डेलरले नेपालमा कोरोनाले जटिल अवस्था सिर्जना गर्न सक्ने हुँदा ध्यान दिन सरकारको ध्यानाकर्षण गराएका छन् ।

प्रधानमन्त्री केपी शर्मा ओलीसँग भ्यान्डेलरले बिहीबार बालुवाटारमा भएको भेटका हुन् ।

भेटमा सहभागी प्रधानमन्त्रीका परराष्ट्र सल्लाहकार डा. राजन भट्टराईले नेपालमा कोरोना सुरुवाती अवस्थामा रहेकाले सचेत रहन आग्रह गरेको जानकारी दिए ।

उनका अनुसार नेपालमा अझै कोरोनाका संक्रमित बढ्न सक्ने भएकाले सरकारले ध्यान दिनुपर्ने भ्यान्डेलरको भनाइ थियो ।

‘प्रधानमन्त्रीले नै बोलाएर भेट गर्नुभएको हो । कोभिड १९ को विषयमा नेपालले गरिरहेको प्रयासको भ्यान्डेलरले प्रशंसा गर्नुभयो,’ डा. भट्टराईले भने, ‘उहाँले नेपालमा कोरोना संक्रमण बढ्नसक्ने भएकाले आइसोलेसनसँगै चेतना पनि बढाउनुपर्यो भन्नु भएको छ ।”

नेपालमा मृत्युदर अन्य देशको भन्दा कम रहेको हुँदा लाग्नेबित्तिकै मरिन्छ भन्ने मानसिकता त्याग्नुपर्ने भ्यान्डेलरको भनाइ थियो ।

उनले स्थानीय तहलाई बढी क्रियाशील बनाउन पनि आग्रह गरेका थिए ।

प्रधानमन्त्रीका प्रेस सल्लाहकार सूर्य थापाका अनुसार महामारीले उग्ररुप लिइरहेको हुँदा सचेत रहन आग्रह गरेका थिए ।

लकडाउनको मोडालिटी अझै व्यवस्थित बनाउनुपर्नेमा पनि उनले जोड दिएका थिए ।