सिन्धुपाल्चोक । सिन्धुपाल्चोकको मेलम्ची नगरपालिका वडा नं। ११ मा पहिरोमा पुरिएर भाडामा बस्ने आठजना बेपत्ता भएका छन् । मेलम्ची बजारस्थित स्वास्थ्य चौकीछेउमै रहेको देवलाल श्रेष्ठको घरमाथिबाट रुखसहित खसेको ढिस्कोले पुरिँदा कभर्ड हल बनाउन आएका कामदार वेपत्ता भएका हुन् ।

पहिरोमा पुरिएर वेपत्ता हुनेहरू कभर्ड हल बनाउन विरगन्ज तथा भारतबाट आएका कामदार रहेको प्रहरीले जनाएको छ । सख्त घाइते अवस्थामा एकजनाको जीवितै उद्धार गरिएको छ । जीवितै उद्धार गरिएका बारू साह नाम गरेका भारतीय नागरिकलाई उपचारको लागि अस्पताल पठाइएको स्थानीय श्याम खड्काले जानकारी दिए ।

इलाका प्रहरी कार्यालय मेलम्चीका प्रहरी निरीक्षक फलबहादुर तामाङले दिएको जानकारीअनुसार पहिरोमा पुरिएर विरगन्जका राजेन्द्र चौरसिया, प्रदीप चौरसिया, राजेश चौधरी तथा स्थानीय कामदार विक्रम थिङ, मानबहादुर रुम्बा, सिमन घ्लान, शिवबालक धामी र सोनम लामा वेपत्ता छन् ।

उद्धारका लागि नेपाली सेना, सशस्त्र प्रहरी र जनपथ प्रहरीसहितको टोली घटनास्थल पुगेको छ ।