ताप्लेजुङ । ताप्लेजुङमा रहेको प्रसिद्ध तीर्थस्थल पाथीभरामा केबलकार निर्माण सम्पन्न भएर सञ्चालन भएपछि ७५ वर्ष माथिका ज्येष्ठ नागरिक र ३ फीट मुनिका बालबालिकाले निःशुल्क चढ्न पाउने भएका छन् ।

पाथीभरामा केबलकारले ज्येष्ठ नागरिक र बालबालिकालाई निःशुल्क सेवा दिने पाथीभरा देवी दर्शन केबलकार सञ्चालक समिति सदस्य रुद्र पौडेलले बताए । ‘उकालोमा हिड्‌न गाह्रो हुने भनेकै ७५ वर्ष माथिका ज्येष्ठ नागरिक र बालबालिकालाई हो,’ उनले भने, ‘उहाँहरूलाई केबलकारले निःशुल्क सेवा दिनेछ ।’

पौडेलका अनुसार केबलकार निर्माणदेखि सञ्चालन गर्दा चाहिने जनशक्ति परिचालनमा पनि स्थानीयलाई प्राथमिकता दिइने छ । यसले स्थानीयलाई रोजगार बनाउने देखिएको छ ।

स्थानीय प्रभावित क्षेत्रका बासिन्दा, विद्यार्थी र फरक क्षमता भएकालाई पनि टिकटमा विशेष सुविधा दिने तयारीमा केबलकार कम्पनी रहेको छ ।

केबलकार सञ्चालन भएपछि प्रभावित स्थानीय तहहरू फुङलिङ नगरपालिका, सिरीजङ्गा गाउँपालिका र फक्ताङलुङ गाउँपालिकाले पनि रोयल्टी पाउने भएका छन् ।

सञ्चालक पौडेलका अनुसार पाथीभरा केबलकारको सामाजिक उत्तरदायित्वको रकम पनि प्रभावित क्षेत्रमा खर्च गरिनेछ । ‘पाथीभरामा निर्माण भइरहेको केबलकारले समग्रमा जिल्ला र जिल्ला वासीलाई नै फाइदा पुग्नेछ,’ सञ्चालक पौडेलले भने, ‘यसले जिल्लाको समृद्धिमा टेवा पुर्‍याउनेछ ।’

हाल पाथीभरामा केबलकार निर्माणको काम भइरहेको छ । अहिले बटम स्टेसनको काम भइरहेको निर्माण कम्पनी हिमालय कन्स्ट्रक्सनका प्रमुख इन्द्र केदेमले जानकारी दिए ।