काठमाडौं । एमाले निकट राष्ट्रिय युवा सङ्घ नेपालले आयोजना गरेको राष्ट्रिय कार्यकर्ता भेलामा ११ सय बढी प्रतिनिधि सहभागी हुने भएका छन् ।

काठमाडौँको प्रज्ञा प्रतिष्ठानमा शनिवार हुने भेलाको प्रधानमन्त्री समेत रहेका एमाले अध्यक्ष केपी शर्मा ओलीले उद्घाटनसहित सम्बोधन गर्ने कार्यक्रम रहेको युवा सङ्घले जनाएको छ ।

शिक्षा, रोजगार, उद्यमशीलता तथा सामाजिक न्याय, समावेशिता र नवीनतामा आधारित योजनाहरूलाई अगाडी सार्दै युवालाई नीति निर्माणमा सहभागिता गराउने उद्देश्यले भेला आयोजना गरेको युवा सङ्घका महासचिव सुमन पुरीले जनाएका छन् ।

युवा सङ्घले भेलामा सहभागी हुन सबै जिल्लाबाट ११ सयभन्दा बढी प्रतिनिधिहरू छनोट गरेको जनाएको छ ।

‘१ हजार १ सय भन्दा बढी प्रतिनिधि भेलामा सहभागी हुन्छन्, पार्टीका नेता कायकर्ता र शुभचिन्तकहरूसमेत गर्दा पाँच हजारको उपस्थिति हुँदैछ’, महासचिव पुरीले भने– ‘युवालाई रोजगारी र स्वरोजगारीका अवसर सिर्जना गर्ने सवालमा भेला फलदायी हुनेछ ।’