विराटनगर । ताप्लेजुङमा केबुलकार बन्ने र रोक्ने विषयले निम्त्याएको शनिबार साँझको घटनामा प्रहरीले आत्मरक्षामात्रै गरेको कोशी प्रदेश सरकारका प्रवक्ता एवं आन्तरिक मामिला तथा कानुनमन्त्री रेवतीरमण भण्डारीले बताएका छन् ।

प्रहरीले आन्दोलनकारीमाथि गोली प्रहार गरेको भन्दै प्रदेश सभामा विरोध भएपछि मन्त्री भण्डारीले सरकारको तर्फबाट घटनाको जानकारी गराउँदै घटनास्थलबाट प्रहरीले खुकुरी, लठ्ठी र गुलेली लगायतका घरेलु हातहतियार बसमेत बरामद गरेको बताए ।

आन्दोलनकारीको तर्फबाट प्रहरीमाथि अचानक ढुंगामुडा भएको र प्रहरी निरीक्षक रोहित शर्मासहित सात जना प्रहरीले अहिले पनि उपचाररत अवस्थामा रहेको उनले जानकारी दिए ।

‘दुःखद् घटना भयो, २१ जना प्रहरीसमेत घाइते भएका छन्, संघर्ष समितिका ३ जनालाई हिजै राति विराटनगरको नोबेल अस्पतालमा ल्याएर उपचार गरिएको छ, मुख्यमन्त्रीको विशेष पहलमा हेलिकप्टरबाट थप उपचारका लागि काठमाडौं लगिएको छ’ उनले भने, ‘ठुलो संख्यामा विभिन्न जिल्लाबाट मान्छे जम्मा हुने र त्यहाँ प्रहरीसँग भिडन्त गर्ने भन्ने संघर्ष समितिको योजना रहेको सुरक्षा निकायले जानकारी प्राप्त गरेको थियो, सयवटा बढी लठ्ठी, ३ थान खुकुरी र गुलेली पनि प्रहरीले बरामद गरेको थियो, बेलुका ५ बजेर ५० मिनेटमा प्रहरीमाथि अन्धधुन्ध ढुंगामुडा भयो ।’

ढुंगामुडापछि प्रहरीले आत्मरक्षाका लागि २० सेल अश्रुग्या“स र १० राउण्ड हवाई फायर गर्दा पनि आक्रमण नरोकिएपछि प्रहरीले आन्मरक्षाका लागि गोली चलाउँदा आन्दोलनकारीहरू घाइते भएको बताए ।

घटनास्थलमा आन्दोलनकारीहरू माथिल्लो भागमा बसेको र करिव ९० जनाको संख्यामा रहेका सशस्त्र र नेपाल प्रहरीमाथि सांघातिक हमला भएको पछि गोली चलाउनु परेको मन्त्री भण्डारीले प्रष्टिकरण दिए । उनले केबुलकार निर्माणका लागि यसअघिकै संघीय सरकारहरूले स्वीकृति दिएको बताए ।

आन्दोलनकारीले केबुलकार बन्न हुँदैन भन्ने धारणा राख्ने गरेको तर त्यहाँ केबुलकार बन्नुपर्छ भन्ने जनमत पनि ठुलो रहेको उनले दाबी गरे । प्रदेशभित्रको घटना भएका कारण प्रदेश सरकार समेत आन्दोलनकारी पक्षसँग वार्तामा बस्न तयार रहेको बताए ।

‘प्रदेश सरकार वार्ता गर्न तयार छ, सरकारले पहिल्यै वार्ता समिति गठन गरिसकेको छ’ उनले भने, ‘सरकारको तर्फबाट हामी आजै भोली नै वार्ता गर्न तयार छौं, तपाँईहरू वार्तामा आउनुस् ।’