ताप्लेजुङ । तीर्थयात्रीको सहजताका लागि ताप्लेजुङको पाथीभरामा निर्माण सुरु भएको केबलकारको पक्षमा जिल्लावासी रहको फुङलिङ नगरपालिकाका मेयर अमिर मादेनले बताएका छन् ।

सोमबार विहान सदरमुकाम फुङलिङमा पत्रकार सम्मेलन गर्दै मेयर मादेनले ‘नो केबलकार समूह’मा जिल्ला बाहिरका निश्चित व्यक्तिहरूको संलग्नता रहेको र उनीहरूले ताप्लेजुङको विकास नचाहेको बताए । उनीहरूकै कारण जिल्ला अशान्त बन्दै गएको उनको दाबी थियो ।

‘म के भन्न चाहन्छु भने, केबलकारको पक्षमा धेरै वर्ष अघिबाट नै जिल्लाका नागरिक थिए । अहिले यो योजना अघि बढेको छ । यो स्थानमा के गर्न हुने, के नहुने सोचेर नगरपालिकाले अनुमति दिएको हो । केबलकार बनेपछि पाथीभराको महिमाको प्रचार हुन्छ । जिल्लाको समृद्धि हुन्छ,’ उनले भने ।

उनले ताप्लेजुङको विकासका विषयमा देश विदेशबाट चासो राख्नु सकरात्मक भए पनि केबलकारको विषयमा भ्रम फैलाएकोमा नगरपालिकाको ध्यानाकर्षण भएको बताए । ‘केबलकारका विषयमा जुन जुन भ्रम फैलाइएको छ । ती सबै गलत हुन् । ताप्लेजुङका नागरिक केबलकारको संधै पक्षमा छन् । र, केबलकार यहाँको आवश्यकता नै हो,’ उनले भने ।

पत्रकार सम्मेलनमा जिल्लाका सबै क्षेत्रका प्रतिनिधि र नागरिकको उपस्थिति थियो ।