सुनसरी । ताप्लेजुङको पाथीभरामा निर्माणाधीन केबलकारको पक्षमा अभिव्यक्ति दिएको भन्दै पदम चेन्जी माबोलाई सुनसरीको धरानमा मोसो दल्ने घटनामा संलग्न भएको आरोपमा प्रहरीले १ जनालाई पक्राउ गरेको छ ।

प्रहरीले जनता समाजवादी पार्टी नेपाल, धरानका उपाध्यक्ष सुमन चेम्जोङलाई पक्राउ गरेको हो । घटनापछि माबोले इलाका प्रहरी कार्यालय धरानमा आफूलाई मोसो दल्ने ८ जना विरुद्ध किटानी जाहेरी दिएका थिए ।

हिजो (सोमबार)को उक्त जाहेरीपछि प्रहरीले आज (मंगलबार) चेम्जोङलाई पक्राउ गरेको हो । उजुरी परेपछि प्रहरीले ८ जनाविरुद्ध जिल्ला अदालत सुनसरीबाट पक्राउ पुर्जीको अनुमति लिएको थियो ।

धरानका डीएसपी प्रकाश जबेगूका अनुसार अदालतको अनुमतिपछि चेम्जोङलाई पक्राउ गरिएको हो । घटनाबारे थप अनुसन्धान भइरहेको उनले जानकारी दिएका छन् ।

गत आइतबार मुक्कुम्लुङ संरक्षण संयुक्त संघर्ष समिति सुनसरीका कार्यकर्ताहरूले धरान–९, पुतलीलाइनमा माबोलाई कुटपिट गरी मोसो दलेका थिए ।

आफूलाई दुर्व्यवहार गर्ने जनमुक्ति पार्टीका केन्द्रीय उपमहासचिव विष्णु थाम्देन, नागरिक उन्मुक्ति पार्टीका केन्द्रीय नेता अमर इजम, पहिचानवादी मोर्चाका नेता जेन्टल लावतीलगायत ८ जनाविरुद्ध माबोले किटानी जाहेरी दिएका थिए ।

मोसो दलिएको घटनापछि ‘नो केबलकार’ समूहको चौतर्फी आलोचना भइरहेको छ । आन्दोलनका नाममा अराजकता मच्चाइएको भनेर दोषीलाई कारबाहीको दायरामा ल्याउनुपर्ने आवाज पनि उठिरहेको छ ।