विराटनगर । चैत २७ गतेबाट कोशी प्रदेश पर्यटन वर्ष २०८२ सुरुवात गर्ने कोशी प्रदेश सरकारले तयारी गरेको छ । तयारी अन्तिम चरणमा पुगेको मन्त्रालयका सचिव विशाल घिमिरेले जानकारी दिए ।

तेह्रथुम जिल्लाको तिनजुरे क्षेत्रमा प्रदेश सरकारले आयोजना गर्ने विशेष कार्यक्रममा प्रधानमन्त्री केपि शर्मा ओलीले पर्यटन वर्ष २०८२ उद्घाटन गर्नेछन् ।

पर्यटन वन तथा वातावरण मन्त्रालयले कोशी प्रदेश भ्रमण वर्षका लागि आवश्यक पूर्वाधार र संरचना तयारी गर्ने उद्देश्यले पर्यटन वर्ष २०८२ मनाउँदै छ । त्यसका लागि चालु वर्ष २०८१ लाई आधार वर्षको रुपमा लिएर पर्यटन विकास, जनशक्ति तयारी, पर्यटन शिक्षा तथा सचेतना सम्बन्धी कामहरु गरेको मन्त्रालयले जनाएको छ ।

पर्यटन वर्ष मनाउनका लागि सरकारले चालु वर्षको बजेटमा १० करोड रुपैयाँ बजेट विनियोजन गरेको छ । तर चालु वर्षमा खर्च गर्न विनियोजन गरिएको रकम तीन महिनाको अवधिमा खर्च हुने सम्भावना भने छैन ।

कोशी प्रदेश पर्यटन वर्ष २०८२ उद्घाटनको नजिक आइपुग्दा पर्यटन, वन तथा वातावरण मन्त्रालयले पर्यटन वर्षको नारा, लोगो र मस्कट तयार पारेको छ । मन्त्रालयले सार्वजनिक सूचना प्रकाशन गरी आह्वान गरेपछि प्राप्त भएको विभिन्न छ वटा प्रस्तावहरुबाट उत्कृष्ट लोगो र मस्कट स्वीकार गरेको मन्त्रालयका सचिव विशाल घिमिरेले जानकारी दिए ।

मन्त्रालयले कोशी प्रदेशको हिमाली क्षेत्रमा पाइने हाब्रेको मस्कट प्रयोग गर्ने निर्णय गरेको छ भने नेपाली राष्ट्रिय झण्डाको कभरमा विश्वमा कोशी टप्पुमामात्र पाइने अर्नाको प्रतिकसँगै सगरमाथा, पहाड, तराई, कोशी नदी र सुन्दर प्राकृतिक सम्पदा झल्काउने प्रतिकहरु प्रयोग गरी बनाएको लोगो प्रयोग गर्ने भएको छ । उक्त लोगो बुधबार पर्यटन, वन तथा वातावरण मन्त्री सदानन्द मण्डलले अनावरण गरे ।

मन्त्रालयले ‘कोशीको गौरव हिमालको शान, पर्यटन वर्षमा सबैलाई सम्मान’ भन्ने नारा तय गरेको छ । उक्त नारा पनि प्रतिस्पर्धाबाट छानिएको बुधबार पत्रकारहरुसँग आयोजना गरिएको अन्तरक्रिया कार्यक्रममा जानकारी दिइयो ।

कार्यक्रममा मन्त्री मण्डलले कोशी प्रदेशको प्रमुख चार धार्मिक गन्तव्यहरु र पर्यापर्यटन, पैदलमार्गहरुलाई विशेष जोड दिइर पर्यटन प्रवद्र्धन गर्न चाहेको बताए । उनले वराह क्षेत्र, हलेसी, पाथीभरा र रामधुनीलाई प्रवद्र्धन गरेर ठूलो संख्यामा धार्मिक पर्यटकहरु ल्याउन सकिने सम्भावना रहेको बताए । त्यसका लागि प्रचारप्रसार र बजारीकरणमा मन्त्रालयले काम गर्ने पनि बताए ।

केही दिनअघि मात्र बराह क्षेत्रमा बागेश्वर गुरु भ्रमणका लागि आउँदा १५ लाख भन्दा बढी पर्यटकहरु त्यहाँ पुगेको जानकारी दिँदै मन्त्री मण्डलले रामधुनी र हलेसीमा पनि त्यस्तै सम्भावनाहरु रहेकोले सरकारले धार्मिक पर्यटनलाई विशेष जोड दिने बताए । उनले विश्वामित्र ऋषिको तपोभूमिको रुपमा रहेको कोशीतटमा अवस्थित रामधुनीलाई भारतमा मार्केटिङ गरी धेरै पर्यटक ल्याउन सकिने भएकोले त्यसको तयारी गर्ने बताए । त्यस्तै कोशी प्रदेशमा निर्माण भएका र निर्माणाधीन चारवटा पैदल मार्ग (टे«ल)हरु मार्फत पनि पर्यटन विकासको सम्भावना खोजी गर्ने उनले बताए ।

कोशी प्रदेश पर्यटन वर्ष २०८२ मा धेरैभन्दा धेरै पर्यटक भित्र्याउन र उनीहरुलाई विभिन्न पर्यटकीय गन्तव्यहरुमा पु¥याई उचित बसोबास र सहज यात्राका लागि आवश्यक तयारीमा सरकारले काम गरिरहेको मन्त्री मण्डलले बताए । उनले भारतीय पर्यटकहरुको सहजताका लागि सीमा क्षेत्रबाट आउने भारतीय पर्यटकका गाडीहरुमा विशेष स्टिकर लगाउने तयारी अन्तिम चरणमा पुगेको जानकारी दिए । यद्यपि उनले कोशी सरकारसँग कति पर्यटक आइरहेका छन् भन्ने तथ्यांक नभएको स्वीकार गरे । मन्त्री मण्डलले पर्यटन क्षेत्रको विकासका लागि संचार क्षेत्रसँग सहकार्य गरेर अघि बढ्न आफूहरु तत्पर रहेकोले समय समयमा छलफल र अन्तरक्रिया गर्दै अघि बढ्ने बताए ।

मन्त्रालयका सचिव विशाल घिमिरेले मन्त्रालयले प्रवद्र्धनको क्षेत्रमा विभिन्न ढंगले काम गरिरहेको बताए । उनले पर्यटन क्षेत्रका व्यवसायीहरुसँग छलफल अन्तरक्रिया, भारतीय फुटबल खेलाडी तथा नेता भाइचुङ भुटियालाई आमन्त्रण गरेर छलफल गर्नेदेखि प्रवद्र्धनका लागि अनेकौं प्रयास भइरहेको तर त्यसलाई मिडियामार्फत जनताका बिचमा लैजान नसकेको बताए । उनले आफूहरु पर्यटन प्रवद्र्धनको क्षेत्रमा नयाँ भएको र नीतिगत सुधारको दिशामा अघि बढिरहेको भन्दै अब प्रवद्र्धनमा विशेष जोड दिने पनि बताए ।

छलफल कार्यक्रममा कोशी प्रदेश पर्यटन पर्यटन वर्ष २०८२ को सचिवालयका सहसंयोजकद्वय कृष्ण साह, र भविस कुमार श्रेष्ठले पर्यटन वर्षको तयारीका क्रममा भइरहेका कामहरुका बारेमा जानकारी दिएका थिए ।

सहसंयोजक श्रेष्ठले सरकारसँग पर्यटकको तथ्यांक अभाव रहेको भन्दै नेपाल राष्ट्र बैंकले भारतबाट प्रवेश गरेको गाडीको संख्याका आधारमा लिएको तथ्यांकबाहेक अरु विश्वस्त हुने तथ्यांकको अभाव देखिएको भन्दै सरकारले पर्यटन वर्षको दौरानमा भारतसँगको चार मुख्य नाकामा पर्यटन सूचना केन्द्र स्थापना गरी तथ्यांक संकलनलाई व्यवस्थित गर्ने विश्वास व्यक्त गरे । पर्यटन वर्षको तयारीकै सन्दर्भमा सरकारले ५०० पर्यटन सहयोगी (भोलेन्टियर्स)हरु तयार गरिरहेको पनि त्यस क्रममा जानकारी दिइएको थियो । उनले बजारीकरण भइसकेको क्षेत्रलाई थप प्रवद्र्धन गर्ने र ओझेलमा परेका पर्यटकीय गन्तव्यहरुलाई प्रवद्र्धनमा जोड दिने बताए ।

कोशी प्रदेशमा पर्यटन पूर्वाधारको विकास उल्लेख्यरुपमा भइरहेको जानकारी पनि कार्यक्रममा दिइएको थियो । यहाँ चार वटा पाँचतारे होटल सञ्चालनमा रहेको र विराटनगरमै थप चार वटा पाँचतारे होटलहरु स्थापनाको क्रममा रहेकोले कोशी प्रदेश पर्यटन पूर्वाधारको दृष्टिले बलियो हुँदै गएको बताइएको छ । त्यस्तै हजारौं होटल र दर्ता भएका १०४ ओटा होमस्टेहरुले ग्रामीण पर्यटन विकास र प्रवद्र्धनमा योगदान गरिरहेको बताइएको छ ।

अन्तरक्रियामा सहभागी पत्रकारहरुले पर्यटन क्षेत्रको विकासमा सरकारले गरिरहेको काम र गर्नुपर्ने र सुधार गर्नुपर्ने क्षेत्रहरुका बारेमा थुप्रै सुझावहरु दिएका थिए । उनीहरुले पर्यटन प्रवद्र्धनमा स्थानीय संचार माध्यमहरुको उपयोग गर्न र संचार क्षेत्रको सहयोग लिएर अघि बढ्न सुझाव दिएका थिए ।