विराटनगर । विराटनगरको नोबेलमा मोरङ र सुनसरीका थप दुईजना संक्रमितको मृत्यु भएको छ ।

मोरङकी ७२ वर्षीया वृद्धा र सुनसरीका ४५ वर्षीय पुरुषको उपचारका क्रममा मृत्यु भएको हो ।

मोरङको रंगेली नगरपालिका–४ का ७२ वर्षीय संक्रमित वृद्धको बिहीबार राति मृत्यु भएको अस्पताल प्रबन्धक नारायण दाहालले जानकारी दिए ।

बुधबार बिहान मात्र अस्पताल भर्ना भएकी वृद्धाको श्वासप्रश्वासमा समस्या थियो । वृद्धको आइसीयूमा उपचारकै क्रममा मृत्यु भएको हो । उनको पीसीआर रिपोर्ट बुधबार राति पोजिटिभ आएको थियो ।

मृतक महिलामा थाइराइड र फोक्सो सम्बन्धी पुरानै समस्या रहेको थियो ।

त्यसैगरी सुनसरीको धरान उपमहानगरपालिका–१२ का ४५ वर्षीय पुरुषको शुक्रबार बिहान मृत्यु भएको छ ।

असोज १७ गते नोबेल अस्पतालमा भर्ना भएका पुरुषको पीसीआर रिपोर्ट असोज १८ गते पोजेटिभ आएको थियो ।

मृतक पुरुष दीर्घरोगी नभए पनि श्वासप्रश्वास र फोक्सोमा समस्या देखिएको थियो । बिहीबार साँझमात्र धरानस्थित बीपी स्वास्थ्य विज्ञान प्रतिष्ठानमा दुई जनाको मृत्यु भएको थियो ।

योसँगै नेपालमा कोरोनाले मृत्यु हुनेको संख्या ५९४ पुगेको छ ।