विराटनगर । कोरोना संक्रमणका कारण एकजना सशस्त्र प्रहरी निरीक्षक (इन्सपेक्टर) को सोमबार राती मोरङमा मृत्यु भएको छ । मोरङको बूढीगंगा गाउँपालिकास्थित विराट शिक्षण अस्पतालमा सशस्त्रका इन्सपेक्टर ३३ वर्षीय नवीन बुढाथोकीको मृत्यु भएको हो ।

अस्पतालका आइसोलेसन प्रमुख सुनिल देवका अनुसार भेन्टिलेटरमा उपचाररत इन्सपेक्टर बुढाथोकीको राति ११स्२२ बजेतिर ज्यान गएको हो । कोरोना संक्रमित बुढाथोकीको पछिल्लो समय फोक्सोले काम गर्न छाडेको उनले बताए ।

तेह्रथुमको म्याङ्लुङ् घर भएका उनी मोरङको बूढीगंगास्थित टंकीसिनवारीमा रहेको सशस्त्र प्रहरी बल नेपाल नम्बर ३ गण हेड क्वाटर कंकालिनीमा गत भदौदेखि कार्यरत थिए । ब्याडमिन्टन खेल्दाखेल्दै एक्कासी श्वासप्रश्वासमा समस्या भएपछि गत कात्तिक २६ गते उनलाई उपचारका लागि विराट शिक्षण अस्पताल भर्ना गरिएको थियो ।

उपचारका क्रममा पीसीआर परीक्षण गराउँदा भोलिपल्ट अर्थात् २७ गते कोरोना रिपोर्ट पोजिटिभ आएको आइसोलेसन प्रमुख देवले जानकारी दिए । उनका अनुसार उपचारका क्रममा सुरुमा केही सुधार देखिए पनि अन्ततः संक्रमित इन्सपेक्टरलाई बचाउन सकिएन ।

उपचार गराइरहँदा स्वास्थ्यमा समस्या थपिँदै गएपछि सुरुमा आइसीयूमा राखिएको देवले बताए । झन् अवस्था चिन्ताजनक बनेपछि भेन्टिलेटरमा राखेर उपचार जारी राखिए पनि बचाउन नसकिएको उनको भनाइ छ । उपचारका क्रममा बुढाथोकीको दुई पटक प्लाज्मा थेरापी गरिएको उनले बताए ।