विराटनगर । विराटनगरका उद्योगीका लागि मात्रै सामाजिक विकास मन्त्रालयले सुटुक्क कोरोना खोप लगाउन सुरु गरेपछि शुक्रबार स्थानीयले खोप स्थान घेराउ गर्दै अबरोध गरेका छन् । विराटनगरको तीनपैनी चोकमा रहेको सिटी सिनेमा हलमा उद्योगीलाई भेला गरेर सामाजिक विकास मन्त्रालयले कोरोना विरुद्धको दोस्रो जोड उपलब्ध गराएको थियो ।

स्थानीयले सो जानकारी पाएपछि सोही स्थानमा पुगेर पहुँचवालालाई मात्रै खोप लगाएको भन्दै बिरोध जनाएपछि उद्योगी र खोप लगाउन पुगेका स्वास्थ्यकर्मीको केही समय भागाभाग भएको हो । सुरक्षाकर्मी, स्वास्थ्यकर्मीसहित फ्रन्टलाइनरलाई खटिएकालाई नभई उद्योगीलाई मात्रै बोलाएर खोप दिएका कारण अबरोध गरेको स्थानीय युवाताजिम अन्सारीले बताए ।

‘फन्टलाईनमा काम गर्नेले पाएका छैनन्, स्वास्थ्यकर्मी र सुरक्षाकर्मी जोखिममा छन्, सर्वसाधारालाई घरमा थुनेर, व्यापारीलाई मात्रै खोप लगाउन खोजेकाले विरोध गर्दै अबरोध गरेका हौँ,’ उनले भने । खोप लगाएको जानकारी पाएपछि पुगेका स्थानीयले अवरोध गरेपछि केही समय उद्योगीको भागाभाग भएको थियो ।

शुक्रबार दिउँसो अवरोध गर्दै स्थानीय पुगेपछि प्रहरी पनि पुगेको थियो । स्थानीयले अवरोध गर्न खोज्दा खोप लगाउन गएका स्वास्थ्यकर्मी र उद्योगीलाई प्रहरीले सुरक्षा दिएर गन्तव्य तर्फ पठाएको थियो भने केही भागेर निस्किएका थिए ।

सर्वसाधारणले पहिलो खोप पनि नपाएको समयमा सरकारले खोपको व्यापार गरेको स्थानीयको आरोप छ । सामाजिक विकास मन्त्रालयले चुनाव नजिकिदा उद्योगीलाई मात्रै खोप दिएर फकाउन खोजेको अबरोध गर्न पुगेका स्थानीय तथा परिवर्तनका लागि हातेमालो संस्थाका अध्यक्ष विनोद चौहालले आरोप लगाए । स्थानीयले केही समय सो स्थानलाई घेराउ समेत गरेका थिए ।

यता सिटी सिनेमाको सञ्चालक मध्येका एक रहेका उद्योग संगठनका अध्यक्ष सुयस प्याकुरेलले खोप लगाएको विषयमा आफूलाई जानकारी नभएको बताउँछन् । ‘सिटी सिनेमामा भिडभाड थियो भन्ने जानकारी मलाई पनि आयो,’ उनले भने ‘तर, म घरबाट बाहिर निस्किएको छैन, थाहा भएन ।’ कोभिशिल्डको पहिलो डोज लगाएका विराटनगरका उद्योगीलाई सिटी सिनेमा हलमा भेला हुन सामाजिक विकास मन्त्रालयले आग्रह गरेको एक व्यापारीले बताए ।

यता मोरङ प्रहरी उपरीक्षक सन्तोष खड्का होहल्ला भएपछि मात्रै प्रहरीलाई खोप लगाइएको बारे जानकारी भएको बताउँछन् । जानकारी आएपछि खोप माग्दै पुगेका सर्वसाधारणलाई सम्झाई बुझाई पठाएको उनले बताए । ‘हामीलाई पनि खोपका बारेमा जानकारी थिएन, सूचना आएपछि प्रहरी टोली मद्दतका लागि पुग्यो,’ उनले भने,‘ खोप माग्ने सर्वसाधारणलाई छैन रहेछ भन्दै सम्झाएर पठायौं ।’

खोपका लागि सो स्थानमा पुगेको बा १ झ ९३६५ नम्बरको सरकारी गाडी र कर्मचारीलाई प्रहरीकै स्कर्टिङमा फिर्ता पठाईएको थियो । खोप लगाउने बिषयबारे विराटनगर महानगरपालिका समेत अनविज्ञ रहेको महानगर प्रमुख भीम पराजुलीले बताएका छन् ।

स्वास्थ्य सम्बन्धि जिम्मेवार कर्मचारीहरुले आफुहरुलाई खोपको बिषयमा कुनै जानकारी नरहेको स्पष्ट पारेका छन् । विराटनगर वडा २ का वडाध्यक्ष कुमार पोखरेलले पनि आफुलाई खोप लगाउने बिषयमा कुनै जानकारी नआएको बताएका छन् । तर खोप लगाउन आएका स्वास्थ्यकर्र्मीहरुले भने सो बिषयमा कुनै प्रतिक्रया दिन मानेका छैनन् ।

स्थानीयका अनुसार उद्योग संगठन मोरङ र मोरङ व्यापार संघको अगुवाईमा ३ सय जना निश्चित व्यक्तिहरुलाई कोरोना विरुद्धको खोप लगाउने प्रबन्ध मिलाईएको थियो । यसैबिच नेपाली कांग्रेस प्रदेश १ प्रमुख सचेतक केदार कार्की जनतालाई घरमा थुनेर प्रदेश सरकारले एमालेको ओली गुटकालाई मात्रै कोरोनाको खोप लगाएको आरोप लगाए । ‘जनतालाई घरबाट ननिस्कनु भन्छ सरकार, एमालेको पनि ओली गुटकालाई कार्यालयमा बोलाई बोलाई कोरोनाको खोप लगाए,’ उनले भने, ‘यो सरकार जनताप्रति उत्तरदाही छैन ।’