काठमाडौं । ताप्लेजुङमा निर्माण भइरहेको पाथीभरा केबलकारको विरोधमा सुरु भएको आन्दोलन र जिल्लाको विकासका विषयमा जानकारी दिन एमाले सचिव तथा सांसद योगेश भट्टराईले आज पत्रकार सम्मेलन गर्दैछन् ।

मध्यान्ह १२ बजे काठमाडौंको बागबजार स्थित होटल हार्दिकमा पत्रकार सम्मेलन गरी जिल्लाको समस्या र यसको निकासका विषयमा भट्टराईले जानकारी दिने उनका स्वकीय सचिव सन्तोस मादेनले जानकारी दिए ।

यसै विषयमा गृहमन्त्री रमेश लेखकले हिजो ताप्लेजुङसहित सम्बन्धित ४ जिल्लाका सांसदहरूसँग छलफल गरेका थिए । मङ्गलबार साँझ गृहमन्त्री लेखकले ताप्लेजुङ, पाँचथर, तेह्रथुम र इलामका प्रतिनिधिसँग छलफल गरेका हुन् ।

शनिबार केबलकार निर्माणको विरोधमा उत्रिएका पहिचान पक्षधरहरूको समूह र सुरक्षाकर्मीसँग झडप भएको थियो । यसैक्रममा केही प्रदर्शनकारीलाई गोली लागेको थियो । थप तनावको अवस्था सिर्जना हुन नदिन गृहमन्त्रीले जिल्लाका सांसदहरूसँग छलफल सुरु गरेका हुन् ।

छलफलबारे सञ्चारकर्मीहरूसँग कुरा गर्दै एमाले सचिव योगेश भट्टराईले ताप्लेजुङको पाथीभरा मन्दिरमा सबैलाई सहज होस् भनेर केबलकार निर्माण गर्ने योजना अघि बढेको भएपनि केही व्यक्ति र समूहले धर्म संस्कृति मासिने भन्दै विरोध केही वर्षदेखि नै भइरहेको बताए ।

केबुलकार बनाउने क्रमसँगै माघ १२ गते दोहोरो हातपात हुँदा सुरक्षाकर्मीहरूले बल प्रयोग गरेको र त्यसले केही घाइते भएको उनले बताए । परिस्थितिलाई सामान्यीकरण गर्ने, भड्किन नदिने र वार्ताबाट समाधान खोज्नेबारेमा छलफल भएको उनले बताए ।

उनले विकास निर्माणको कामलाई पनि अघि बढाएर भएका समस्यालाई समाधान गर्ने बताएका छन् । विरोधीहरूसँग पनि संवाद गर्ने निष्कर्ष निस्किएको उनले बताए । घाइते भएकाहरूको सरकारले स्वास्थ्योपचार गर्ने मागमा गृहमन्त्री रमेश लेखकले सरकारले स्वास्थ्योपचार गर्ने प्रतिबद्धता जनाएको उनले जानकारी दिए । उनले सम्बन्धित मन्त्रालयसँग पनि छलफल गरेर अघि बढ्ने सहमति भएको बताए ।