काठमाडौँ । विश्वभर कोरोनाभाइरसले कहाली लाग्दो अवस्था निम्त्याएको छ। चीनको वुहान शहरबाट फैलिन शुरु भएको यस भाइरसले सारा संसारलाई थिलथिलो बनाएको छ।

विश्वका धनाड्य देशहरुले पनि यस भाइरसको अगाडि घुँडा टेकिसकेको अवस्था छ । विश्वव्यापी रुपमा फैलिएको कोरोनाभाइरसले हालसम्म विश्वका २ सय १३ देशहरुलाई प्रत्यक्ष प्रभावित गरिसकेको छ।

जोन हप्किन्स विश्वविद्यालयकाअनुसार शुक्रबार बिहानसम्म विश्वभर २ करोड ८४ लाख ३ सय ८१ जना मानिसहरु कोरोनाबाट संक्रमित भएका छन् भने मृत्यु हुने संख्या ७ लाख ५४ हजार ५ सय ६६ पुगेको छ। यसैबीच, वैज्ञानिकहरूले माउथवाशले कोरोना जोखिम कमगर्ने दावी गरेका छन्।

वैज्ञानिकहरुका अनुसार बजारमा पाइने केहि माउथवाशले केहि हदसम्म कोरोनाको जोखिम कम गर्ने बताएका छन्। उनीहरुले माउथवासले कुल्ला गर्दा गलामा भएका भाइरस पनि कम हुने दाबी गरेका छन्। रुहर–युनिभर्सिटी र बोचमका भाइरोलोजिष्टहरूले आफ्नो साथीहरुसँग गरेको संयुक्त अध्ययनमा सो पत्ता लगाएका हुन्।

केही कोरोना बिरामीमा भाइरसको भारी मात्रा मुख र गलामा पाइने भएका कारण प्रभावकारी माउथवाशको प्रयोगगर्दा भाइरल भार कम गर्न र सम्भावित छोटो अवधिमा कोरोनाभाइरस प्रसारणको जोखिम कम गर्न मद्दत पु¥याउँने वैज्ञानिकहरूले बताएका छन्।

यसैगरी, यो दन्त उपचार गर्दा पनि उपयोगी हुने उनीहरुको भनाइ छ। माउथवाशले कोरोनाको जोखिम सीमित समयको लागि रोक्न सकिन्छ। यद्यपि, वैज्ञानिकहरूले माउथवाश कोरोनाको लागि निश्चित उपचार भने होइने र यसले भाइरसलाई पूर्ण रूपमा हटाउन कुनै भूमिका नखेल्ने चेतावनी दिएका छन्।

यसैगरी, भाइरस संक्रमित व्यक्तिको ड्रपलेट्स वा थोपाबाट स्वास्थ्यकर व्यक्तिको मुख, नाक र आँखासम्म पुग्छन्। यस्तो अवस्थामा माउथवाशबाट तुरुन्त कुल्ला गर्दा भाइरसको मात्रा शरीरबाट केही कम हुने वैज्ञानिकहरुले बताएका छन्। यद्यपि, यसको थप अध्ययन र अनुसन्धान भइरहेको छ।