ताप्लेजुङ । यातायात व्यावसायीले ताप्लेजुङमा यातायात बन्दको घोषणा गरेका छन् ।

काफ्लेपार्टी नजिकै केबलकारको बटम स्टेसन बन्ने ठाउँमा प्रहरी र ‘नो केबलकार समूह’ बिच भएको झडपमा घाइते भएकाहरूको उद्धारमा खटिएको रेडक्रसकर्मी, उद्योग वाणिज्य संघ कर्मी र इन्सेक प्रतिनिधि चढेको गाडी आन्दोलनरत समूहले तोडफोड गर्दै चालकलाई कुटपिट गरेको विरोधमा ताप्लेजुङ भित्रने सबै यातायात बन्द गरेको बताइएको छ ।

गाडी तोडफोडसँगै चालकलाई समेत कुटपिट गरेको र उक्त जिम्मा आन्दोलनरत पक्षले लिएर क्षति नबेहोरे सम्म यातायात ठप्प गरिएको यातायात व्यावसायी सङ्घ काफ्लेपाटीका अध्यक्ष कुमार लिम्बूले बताए ।

आन्दोलनकारीको कुटपिटबाट घाइते भएका चालक चालक फुङलिङ नगरपालिका–९ का ३५ वर्षीय राजकुमार पौडेल र झडपमा घाइते भएका सुरक्षाकर्मीहरूलाई उपचारको लागि जिल्ला अस्पताल ताप्लेजुङ ल्याइएको इन्सेक प्रतिनिधि एलिना दियालीले जानकारी दिइन् ।

उनका अनुसार आन्दोलनकारीले अधिकारकर्मी सवार मे १ ज २५७९ को गाडी तोडफोड गरेका छन् । तोडफोडबाट गाडीको सबै सिसामा क्षति पुगेको छ ।